Tempalai Jaku
Aku dulu meri tabi basa ngagai bala kitai , kelebih kitai serumah serta bala ke sama bisi ngabas “ Laman Web Rumah Panjai Lubok Kerupok”. Tuju aku ngumpul jerita tuai Iban kelia awak ke kitai ti rebak diatu enggau anak telesak, uchu ambu, ichit wit, tiris pantis, darah getah bansa Iban dudi ari ila ulih beratika kaul antara bansa kitai Iban ari kelia nyentuk ke sari tu.
Ari ke macha “Jerita Tuai’ tu, kitai tau sama berunding nama kebuah bansa kitai Iban nyamai endar disabung orang ngelaban diri sama diri ketegal ti deka ngiga dengah. Kitai Iban lama udah disapi ngena penemu munuh manah ari nulung, pechah manah ari berserakup, gawa ke bansa bukai manah agi gawa ke bansa diri, betuaika bansa bukai manah agi ari betuaika bansa diri.
Kelimpah ari nya, peragam runding kitai Iban agi meda bansa diri baka pulau laban kitai nadai kakang ati ngayau bansa diri ke enda saum ai saum pendaie enggau kitai. Iban udu pechah ketegal ti balat ngiga rita diri ditemu orang berani mayuh dengah tauka minta kelala orang kaya raja ketegal ti mayuh padi enggau perapasan.
Enti nitih ke pematut , kitai Iban patut belajar ari utai ke nyadi seratus ngagai dua ratus taun ke udah. Kelia Iban dipechah Rajah Brooke ngena pala munsuh, tang sari tu kitai Iban agi ulih dipechahka orang ngena keretas chap pala agong serta kuasa dalam politik.
Aki ini kitai kelia ke ngelaban perintah Rajah Brooke kelia anang ngumbai sida iya gila ngelanggar undang-undang tauka tuyu nyakal pemansang. Anang ngumbai sida sengaja deka bebunuh, deka bemunsuh, deka bamuk, deka betumbuk, deka ngiga dengah, sengaja ngereja penyalah. Iya ke bendar sida enda lantang ati meda anak Kampar ke baru datai ngindikka kaki ba menua kitai tu nyau kigang-kigang tauka rigang-rigang bechekak pinggang nyadi Raja, kuchah-kuchah deka merintah sepeneka ati sida. Daya idup Iban dikachau, tanah buah Iban ditasau, umai tempalai Iban diketau. Reta tengkira Iban diambi, babi manuk iban dipenyati, bansa Iban deka dikemeli. Enti ngelaban Iban diukum, diau diri Iban digaga baka ulun. Nya meh kebuah aki ini kitai kelia nirika kayau ngelaban Rajah Brooke laban ngasaika diri udah berantuka nyawa, berambun ke seput serta begadai ka pala diri empu lebuh ti muai aging ngerumpang batang, muai pituh chundung nutuh ensurai berayung, ngulih ka menua alai Iban berumah ngaga tanah, berimba ngaga temuda, bumai ngaga peyedai, ngelasi pendai ngaga pemandi.
Pemacha maioh, aku minta ampun enti sema jerita-jerita Tuai Iban kelia tu tau ngasuh ati kitai ensiban, mata kitai empeleman laban tuju nyerungkai jerita lama tu ukai mai belaya, ukai deka ngemediska ati sapa-sapa tang arapka jerita ke bakatu tau pulai ke lalau pendiau lalu tau mega dipelajarka anak tauka uchu ichit kitai . Utai ti udah nyadi dulu menya tetap nyadi lalu enda ulih ubah kitai. Nya alai ari jerita baka tu, sida ti rebak dudi tau bulih gambar ti betul senentang utai ke udah nyadi ba bansa kitai Iban. Penyaru ke udah , pengawa ke salah enda patut ditampung kitai rebak dudi tu enti deka meda bansa kitai mansang nuju pemujur, pengelantang enggau penyenang.
Dalam dunya tu , kitai peturun Iban amat baka garam enda bulih segengam, amat baka berau enda bulih sechapan, amat baka paku enda bulih se-emperan. Tang di Sarawak ditu kitai beberita mayuh ari beluh nyaru arang, beberita banyak ari lemetak di Tinting Kedang tang mayuh peturun kitai Iban enda nemu kenyalang tebilang ketegal tangkung, bukit beberita ketegal remaung. Iban dipebasa enti begempung,
Mayuh anak Iban enda nemu Kempat Tiang tebilang laban langgai, Sarawak tampak ketegal sungai, Iban kering enti begulai sejalai. Maioh anak Iban enda nemu Kelingkang tebilang ketegal tinting, Panggau Libau beberita ketegal Keling, Iban berkuasa enti sama penemu saum runding. Maioh anak Iban enda nemu Batang Lupar tebangkar ketegal Bujang Senang, rita Gelung begemung ketegal Kumang, Iban kering enti sama kuing saum singkang.
Enti kelia bansa kitai Iban tu sigi beberita luba ari seleka pinang muring, tinggi ari lenggi benda panding, nyulut ari sekukut dilah juing, nama kebuah bansa kitai Iban diatu nyau mudah endar lemi di pelepi pala patung, ikak di kechiak arung beradung, penat di rakat tamping perempung, rapa dipeda mata menchenung…..buta ketegal keretas pala agong, tepejuh engkerejuk ketegal kuasa?
Aku dulu meri tabi basa ngagai bala kitai , kelebih kitai serumah serta bala ke sama bisi ngabas “ Laman Web Rumah Panjai Lubok Kerupok”. Tuju aku ngumpul jerita tuai Iban kelia awak ke kitai ti rebak diatu enggau anak telesak, uchu ambu, ichit wit, tiris pantis, darah getah bansa Iban dudi ari ila ulih beratika kaul antara bansa kitai Iban ari kelia nyentuk ke sari tu.
Ari ke macha “Jerita Tuai’ tu, kitai tau sama berunding nama kebuah bansa kitai Iban nyamai endar disabung orang ngelaban diri sama diri ketegal ti deka ngiga dengah. Kitai Iban lama udah disapi ngena penemu munuh manah ari nulung, pechah manah ari berserakup, gawa ke bansa bukai manah agi gawa ke bansa diri, betuaika bansa bukai manah agi ari betuaika bansa diri.
Kelimpah ari nya, peragam runding kitai Iban agi meda bansa diri baka pulau laban kitai nadai kakang ati ngayau bansa diri ke enda saum ai saum pendaie enggau kitai. Iban udu pechah ketegal ti balat ngiga rita diri ditemu orang berani mayuh dengah tauka minta kelala orang kaya raja ketegal ti mayuh padi enggau perapasan.
Enti nitih ke pematut , kitai Iban patut belajar ari utai ke nyadi seratus ngagai dua ratus taun ke udah. Kelia Iban dipechah Rajah Brooke ngena pala munsuh, tang sari tu kitai Iban agi ulih dipechahka orang ngena keretas chap pala agong serta kuasa dalam politik.
Aki ini kitai kelia ke ngelaban perintah Rajah Brooke kelia anang ngumbai sida iya gila ngelanggar undang-undang tauka tuyu nyakal pemansang. Anang ngumbai sida sengaja deka bebunuh, deka bemunsuh, deka bamuk, deka betumbuk, deka ngiga dengah, sengaja ngereja penyalah. Iya ke bendar sida enda lantang ati meda anak Kampar ke baru datai ngindikka kaki ba menua kitai tu nyau kigang-kigang tauka rigang-rigang bechekak pinggang nyadi Raja, kuchah-kuchah deka merintah sepeneka ati sida. Daya idup Iban dikachau, tanah buah Iban ditasau, umai tempalai Iban diketau. Reta tengkira Iban diambi, babi manuk iban dipenyati, bansa Iban deka dikemeli. Enti ngelaban Iban diukum, diau diri Iban digaga baka ulun. Nya meh kebuah aki ini kitai kelia nirika kayau ngelaban Rajah Brooke laban ngasaika diri udah berantuka nyawa, berambun ke seput serta begadai ka pala diri empu lebuh ti muai aging ngerumpang batang, muai pituh chundung nutuh ensurai berayung, ngulih ka menua alai Iban berumah ngaga tanah, berimba ngaga temuda, bumai ngaga peyedai, ngelasi pendai ngaga pemandi.
Pemacha maioh, aku minta ampun enti sema jerita-jerita Tuai Iban kelia tu tau ngasuh ati kitai ensiban, mata kitai empeleman laban tuju nyerungkai jerita lama tu ukai mai belaya, ukai deka ngemediska ati sapa-sapa tang arapka jerita ke bakatu tau pulai ke lalau pendiau lalu tau mega dipelajarka anak tauka uchu ichit kitai . Utai ti udah nyadi dulu menya tetap nyadi lalu enda ulih ubah kitai. Nya alai ari jerita baka tu, sida ti rebak dudi tau bulih gambar ti betul senentang utai ke udah nyadi ba bansa kitai Iban. Penyaru ke udah , pengawa ke salah enda patut ditampung kitai rebak dudi tu enti deka meda bansa kitai mansang nuju pemujur, pengelantang enggau penyenang.
Dalam dunya tu , kitai peturun Iban amat baka garam enda bulih segengam, amat baka berau enda bulih sechapan, amat baka paku enda bulih se-emperan. Tang di Sarawak ditu kitai beberita mayuh ari beluh nyaru arang, beberita banyak ari lemetak di Tinting Kedang tang mayuh peturun kitai Iban enda nemu kenyalang tebilang ketegal tangkung, bukit beberita ketegal remaung. Iban dipebasa enti begempung,
Mayuh anak Iban enda nemu Kempat Tiang tebilang laban langgai, Sarawak tampak ketegal sungai, Iban kering enti begulai sejalai. Maioh anak Iban enda nemu Kelingkang tebilang ketegal tinting, Panggau Libau beberita ketegal Keling, Iban berkuasa enti sama penemu saum runding. Maioh anak Iban enda nemu Batang Lupar tebangkar ketegal Bujang Senang, rita Gelung begemung ketegal Kumang, Iban kering enti sama kuing saum singkang.
Enti kelia bansa kitai Iban tu sigi beberita luba ari seleka pinang muring, tinggi ari lenggi benda panding, nyulut ari sekukut dilah juing, nama kebuah bansa kitai Iban diatu nyau mudah endar lemi di pelepi pala patung, ikak di kechiak arung beradung, penat di rakat tamping perempung, rapa dipeda mata menchenung…..buta ketegal keretas pala agong, tepejuh engkerejuk ketegal kuasa?